Trinta e seis artigos, 111 epígrafes e a estrutura do
proxecto de Lei de Universidades que o conselleiro de Educación levou onte ao
Parlamento de Galicia son “un vulgar plaxio” da norma andaluza aprobada
en 2011 cos votos do Partido Popular. “Os únicos obxectivos que ten”,
denunciou
ademais o deputado de Alternativa Galega de Esquerda (AGE) Ramón Vázquez, “é adaptar a universidade ao chamado espazo europeo de educación
superior e someter o coñecemento xerado na educación pública aos mercados”. Non
unicamente: o texto elimina o galego como lingua vehicular e estabelece uns
requisitos “mínimos, case ridículos” para crear universidades privadas.
O proxecto apoiado polo PP carece, a maiores, dunha
memoria económica. “Abre a porta á privatización pola vía da insuficiencia
financeira”, criticou Vázquez, “e ao falar de dispoñibilidade orzamentaria
falan do que queda despois de entregar os cartos á banca que roubou á xente”. A
lei que a dereita, a través dos seus brazos executivo e lexislativo, quere
sacar adiante afonda na estratexia do deterioro constante do ensino superior
público. Só procura o desprestixio do mesmo para logo poñelo á venda. A
mercantilización da universidade agochada no proxecto de lei é patente ao facer
propios os argumentos do Plan Boloña e mesmo permitir a concesión de créditos
–ao uso estadounidense- aos estudantes. “Queren someter o estudantado á
debedocracia”, alertou o parlamentario de AGE, “ao tempo que reprimen o seu
dereito a protestar. Pero os estudantes non van deixar de protestar, non se
equivoque”.
O PP rexeitou as emendas da oposición e aprobou en
solitario do proxecto de lei do Sistema Universitario de Galicia.
No hay comentarios:
Publicar un comentario