DOCUMENTO DE AVALIACIÓN DA SITUACIÓN INTERNA DE ANOVA – IRMANDADE NACIONALISTA

A Coordinadora Comarcal de ANOVA – Irmandade Nacionalista no Salnés acordou convocar unha Asemblea comarcal urxente para avaliar a situación interna de ANOVA, así coma o proceso de escolla de candidatas e candidatos para integrar na candidatura de Izquierda Unida ao Parlamento Europeo.

A Asemblea tivo lugar o venres 28 de marzo en Sisán – Ribadumia, e por parte de varios membros redactouse esta proposta, que foi aprobada por unaminidade das e dos presentes, coas resolucións que se expresan ao final da mesma, e co mandato de remitila a toda a militancia así como aos órganos de dirección colexiada da organización.

DOCUMENTO DE AVALIACIÓN DA SITUACIÓN INTERNA DE

ANOVA – IRMANDADE NACIONALISTA

Para comprender as resolucións que se propoñen convén lembrar e aclarar:

ALGÚNS DOS PRINCIPIOS FUNDACIONAIS DE ANOVA APROBADOS NA ASEMBLEA CONSTITUÍNTE:

• Afirmar a vixencia dos principios inspiradores do nacionalismo galego; así como os seus obxectivos estratéxicos.
• Considerar que a conquista da soberanía política de Galicia segue a ser un obxectivo.
• Que a nosa acción política debe estar orientada ao servizo dos intereses das maiorías sociais.
• Que debemos practicar a fraternidade e a cooperación fronte á competición, tanto no eido interno, coma na actuación política na sociedade.
• Que acreditamos na participación de todas e de todos en pé de igualdade, no asemblearismo e na toma de decisións de abaixo cara a arriba.
• Que estamos pola creación e consolidación dun novo referente político do nacionalismo e da esquerda en Galiza e ese referente denominouse ANOVA.

A ORIENTACIÓN DO TRABALLO DA MILITANCIA E AS ASEMBLEAS DE ANOVA – IN NO SALNÉS:

Coherentemente con eses principios, nos concellos do Salnés puxémonos a traballar -dende incluso antes xa da constitución formal de ANOVA- no que se chamou o Novo Proxecto Común, e constituímos as asembleas locais, onde se pode participar dun xeito aberto, incluso non militantes.

Apoiamos as demandas e denuncias que diferentes colectivos sociais tiveron no Salnés, como a loita das asociacións veciñais e culturais en Vilagarcía pola imposición da taxa polo uso dos locais públicos, a Plataforma contra o campo de golf do Grove ou as demandas de SOS – Panadeira en Sanxenxo. Participamos en unidade de acción con outras forzas do nacionalismo e da esquerda na defensa dos nosos servizos públicos, como por exemplo na Plataforma en defensa da sanidade pública.

Fixemos un labor de denuncia das políticas que os distintos gobernos do PP no Salnés queren levar a cabo para favorecer intereses particulares e en contra do interese xeral dos veciños e veciñas; casos como por exemplo o "pelotazo" urbanístico que o Concello de Vilanova quixo facer coa área comercial de Deiro, o de Cambados coa actuación nas comportas de Fefiñáns, ou apoiando o labor do concelleiro Enrique Oubiña en Ribadumia, onde é a referencia da oposión ao goberno Salomé Peña – Rafael Louzán.

Tamén traballamos arreo na campaña electoral de AGE nos pasados comicios autonómicos, e esforzámonos para que a coalición electoral na que participaba ANOVA tivese un gran resultado na nosa comarca. Pero mentres desenvolviamos este traballo, orientado ao asentamento e consolidación do proxecto de ANOVA na sociedade galega; a situación da organización a nivel nacional era a seguinte:

DERIVA DA ORGANIZACIÓN:

• Temos que recoñecer que dende a “Asemblea Constituínte” de ANOVA a precipitación, as dinámicas e a presión de pequenos “grupúsculos” -iso si, fortemente organizados- polo control da organización foi evidente e marcou o día a día da organización.
• A proposta de Fronte Ampla para as autonómicas serviu, nun principio, para suavizar a competencia interna, pero non podemos deixar de sospeitar de que todo tivo que ver cunha folla de ruta xa escrita, froito dun acordo previo entre Esquerda Unida e sectores de dentro da nosa organización.
• Co resultado electoral abríanse moitas ilusións e expectativas, pero tamén o risco evidente de confusión do que foi unha estratexia puntual co que debe seguir a ser o camiño fundamental de ANOVA. Isto pode resumirse naquela frase “o espellismo do éxito de AGE pode terminar matanto ANOVA”.
• Na última Asemblea Nacional fíxose evidente unha fractura interna, intensificada por un método de elección -listas abertas con corrección de número- que deu como resultado unha Coordinadora Nacional cunha forte división na que ademais estes “grupúsculos” están totamente “hiperrepresentados”. Comprobouse tamén como xa nesta asemblea había un amplo sector que avogaba por disolver Anova en AGE.
• Nalgunhas localidades, ao mesmo tempo, persoas dunha das correntes organizadas dentro de Anova, protagonizaban feitos lamentables, como a creación de asembleas locais en paralelo ás oficiais (Redondela), a aprobación de regulamentos contrarios aos principios de Anova (Vigo), a negativa a constituír asemblea local (Cangas) ou a constitución ilegal dunha Coordinadora Comarcal no Morrazo sen o consentimento das asembleas locais da comarca; todo con continuos desplantes e ataques persoais a compañeiras e a compañeiros. Triste neste panorama é comprobar como incluso por parte de membros da propia Coordinadora Nacional se “encirraba” e daba cobertura a quen pretende deixar de lado os acordos da Asemblea e os principios fundacionais.
• O debate sobre as alianzas cara ás eleccións europeas e o referendo posterior foi o seguinte pau nas rodas de Anova. Primeiro veu a aposta clara aínda que disimulada nos argumentos, dun sector de Anova por argallar unha alianza con IU Federal, dándolle as costas á denominada “fronte ampla”.
• Logo recibimos, xa en vésperas do referendo, a carta asinada polo Voceiro Nacional, órgano electo que non se debía expresar en favor de ningunha opción. Pero o peor era que na carta explicaba que se producira unha negociación fóra das canles de Anova, allea á Coordinadora Nacional, e admitía, facendo uso dunha enrevesada retórica, a súa claudicación ante IU a cambio dun “posto seguro” para as europeas. Pretendía, e conseguiuno por 11 votos, mover a elección da alianza electoral cara ao lado federalista.
• O seguinte foron as dimisións, o día despois do referendo, doutros dez membros da permanente que, incapaces de facer fronte á realización do aprobado o día anterior, honrosamente deixaron o seu posto para que o ocuparan persoas que se viran con ánimos para ese traballo. Resultou triste coñecer un día antes da Coordinadora Nacional na que esas dimisións se farían efectivas, a composición da nova Permanente grazas á foto dun pano de mesa dun restaurante.
• Finalmente, antes incluso de que a CN debatera e acordara o proceso de escolla das candidatas e candidatos para as eleccións europeas, o noso Voceiro Nacional filtra e promociona o nome dunha candidata, que axiña foi refrendada por IU e Ecosocialistas, co que lle deron así o carácter de “candidata de AGE”, todo isto antes de que a militancia se posicionara e se coñeceran as condicións do pacto de integración das candidatas e candidatos na lista de IU, nin o programa que defenderían, ou como sería a campaña electoral ou o financiamento da mesma.
• As e os membros dimisionarios da Permanente nacional e o sector “nacionalista” de ANOVA forzaron, en contra do criterio do Voceiro Nacional, que a persoa candidata fose elixida pola militancia, previo proceso de presentación de candidaturas e o envío ás bases do acordo con IU.
• O acordo chegou días máis tarde, en vésperas de que rematara o prazo para candidatarse, logo de ser reclamado insistentemente, pero resultou que o papel enviado non era máis ca un esquema xeral, feito “ad hoc” que apenas contiña información relevante. Incluso na mesma comunicación se recoñecía que aínda non está pactado como vai ser o programa conxunto.
• Por último, a pesar de que o acordo aprobado facía referencia explícita a que os órganos de ANOVA non se pronunciasen a favor de ninguén en concreto, o Voceiro Nacional anunciou primeiro e enviou logo un escrito de apoio á ”súa” candidata, esquecendo que el non é un militante máis, senón que ostenta un cargo orgánico para o que foi elixido por todos e por todas, incluídos os outros candidatos e candidata na última Asemblea Nacional, agás xusto a que el “sinalou” co dedo.

Por todo isto non podemos evitar sentir certo sentimento de traizón: Traizoados por quen antepón os resultados e o curtopracismo ao ben común de todos os galegos e galegas, porque sospeitamos que están entregando o proxecto de ANOVA a IU para crear a “izquierda federal del Noroeste”, diluíndo ANOVA nun ente chamado AGE, que claramente se intúe como a versión de ICV para Galiza.

O noso compromiso é defender os principios políticos fundacionais de ANOVA, como armas ideolóxicas capaces de crear alternativas, que son ademais necesarias e urxentes, para contrapoñelas ás políticas destrutivas do PP e de quen ataque os intereses do noso país; e seguir a loitar por construír a ferramenta política, galega e de esquerda rupturista necesaria para poder levalas adiante, CHÁMESE ESA FERRAMENTA ANOVA OU DOUTRO XEITO.

Por todo isto adoptamos as seguintes propostas de resolución:

• Non compartimos a deriva pola que a actual Dirección semella estar a levar a ANOVA, esquecendo os seus principios políticos fundacionais, e pretendendo convertela na “izquierda federal del noroeste”.
• Acreditamos na unidade de acción e nas frontes amplas, por iso non podemos tolerar que se pretenda converter AGE simplemente nunha marca electoral ao servizo único da implantación de IU en Galiza.
• Debemos pedir explicacións á Dirección Nacional e ao Voceiro por este xiro estratéxico que non foi aprobado en ningún órgano. O normal e que se se pretende isto debe ser debatido e votado nunha asemblea nacional onde todas e todos poidamos contrastar os diferentes posicionamentos.
• Dende as Asembleas Locais do Salnés defenderemos o proxecto fundacional de ANOVA como referente do nacionalismo e da esquerda e tentaremos que todas e todos os nacionalistas de ANOVA confluamos nunha dirección común para impedir que se cambien ou se deturpen.
• Seguiremos a traballar na sociedade, nos nosos concellos, ao lado da cidadanía na defensa dos seus dereitos e na denuncia das inxustizas.
• En referencia ás próximas eleccións europeas acordamos rexeitar o acordo de integración na candidatura de IU e, en consecuencia, non participar na próxima campaña electoral. Abriremos tamén un período de reflexión conxunta para decidir se é posible continuar ou non nesta organización que, coa deriva actual, non representa nin o noso proxecto nin as nosas ideas.

Todas estas resolucións acórdanse respectando sempre as posicións individuais que poidan adoptarse ao respecto por parte de militantes do Salnés.

ANOVA – IRMANDADE NACIONALISTA NO SALNÉS DEBATE SOBRE AS ELECCIÓNS EUROPEAS

O conxunto da militancia das asembleas locais de Anova – Irmandade Nacionalista na comarca reúnese este sábado 11 de xaneiro no Centro Social San Andrés de Barrantes a partires das 18:00h para, entre outros temas, debater o papel e o programa da súa organización de cara ós comicios europeos de maio. Como todas as asembleas de ANOVA será aberta non só a militantes e simpatizantes, senón a todas aquelas persoas as que lles interese coñecer a proposta ou aportar o seu grao de area para colaborar nunha alternativa política e social contra as políticas dos gobernos actuais.

Esta participación da militancia insírese dentro dun proceso que rematará cun referendo en cada asemblea para decidir a forma na que Anova – IN participará nas eleccións europeas. Antes deste referendo das bases, a militancia terá a capacidade e a oportunidade de exercer os seus dereitos e obrigas participando nunha xuntanza nacional para rematar de perfilar o programa político.

Polo tanto, este sábado, ademais de tratar cuestións de índole organizativa, a maior parte do tempo adicarase a un, de seguro, intenso e rico debate sobre a Unión Europea e as súas políticas no noso país e na nosa comarca, o que facer en Europa e para que e que Europa desexamos. Todo isto dentro dun proceso aberto á cidadanía e absolutamente transparente e horizontal, demandas que dende Anova – Irmandade Nacionalista recollemos das voces que dende os movementos sociais e a sociedade civil indignada somos quen de escoitar, apoiar e acompañar. Poucas organizacións políticas son quen de abrir as portas deste xeito, permitindo que o aire puro e a brisa do mar entre e revitalice a política, se cadra hoxe máis necesaria ca nunca.

O que si semella claro e que as bases de Anova – IN, ó igual que na I Asemblea Nacional e nas pasadas eleccións autonómicas, apostarán por integrarse nunha fronte ampla non excluínte, de marcado cariz de esquerdas para deter a ignomina e o espolio que dende a dereita e dende a Troika e os poderes financeiros estamos a soportar. A cuestión é saber que outras forzas políticas (partidos, sindicatos, movementos sociais, plataforma…) vexan con bos ollos esta proposta sincera e pensada para as maiorías sociais.

ANOVA – RIBADUMIA ORGANIZA UNHA CHARLA EN BARRANTES PARA INFORMAR SOBRE A REFORMA DAS PENSIÓNS.

Será o próximo xoves, 28 de novembro, as 20.30 H. no Centro Social de Barrantes e intervirán Enrique Oubiña e Xurxo Charlín Trigo, Asesor fiscal e tributario.

A Agrupación local de ANOVA – Irmandade Nacionalista no Concello de Ribadumia ten organizado un acto público para informar sobre as últimas reformas lexislativas que van a afectar as pensións. Será o próximo xoves, 28 de novembro, as 20.30 Horas, no Centro Social “San Andres” de Barrantes, e no mesmo intervirán Enrique Oubiña Lago, Concelleiro na corporación municipal do Concello de Ribadumia e Xurxo Charlín Trigo, Colexiado mercantil e Asesor fiscal e tributario.

O obxectivo do acto e poder explicar aos asistentes as modificacións que o Real Decreto Lei 5/2013 de “Medidas para favorecer a continuidade da vida laboral dos traballadores de maior idade e promover o envellecemento activo”  introduce no sistema de pensións e como nos van a afectar, tanto as persoas xa xubiladas, como aos traballadores actuais: Que supón que as pensións non vaian a actualizarse co IPC, ou como van a cambiar os períodos e bases reguladoras de cotización…. Ao remate haberá unha quenda de preguntas.

A reforma que pretende por en marcha o goberno Mariano Rajoy co apoio do Partido Popular aséntase sobre dúas patas, por un lado cambiar a fórmula de actualización das pensións, desligandoa do IPC; e polo outro relacionar a cuantía da pensión cunha nova variable: a esperanza de vida aos 67 anos.  As dúas propostas teñen o mesmo obxectivo definido polo propio goberno, frenar o aumento do gasto en pensións.  Todo este aforro ira sobre as costas dos pensionistas que irán acumulando ano a ano perda de poder adquisitivo, que segundo como sexa a inflacción anual pode chegar a ser de mais de 1.500 euros/ano nun período de 6 anos para unha pensión media de 980 euros/mes.

A parte de eliminar a actualización automática das pensións co cálculo do IPC, outras modificacións que introduce o decreto e que afectan negativamente aos traballadores actuais serían o aumento paulatino da idade de xubilación (ata os 67 anos), a práctica desaparición das causas de xubilación anticipada ou a ampliación do período de cálculo para a xubilación de 15 a 25 anos. Con esta reforma para poder percibir o 100% da base sera preciso ter un mínimo cotizado de 37 anos. Está calculado que as pensións futuras sufriran unha devaluación cercana ao 20%.

Esta reforma supón novamente cargar os efectos da crise financieira sobre as espaldas dos cidadáns e recortar un dos piares fundamentais do sistema de benestar: as pensións.  Todo coa intención de deteriorar o sistema de protección social e  “abrir unha vía de negocio” para moitas sociedades e compañias aseguradoras multinacionais: Os seguros de xubilación privados.

Dende ANOVA queremos denunciar esta situación e informar aos pensionistas actuais e futuros do que esta reforma vai a supoñer, polo que convidamos a todos os cidadáns interesados a asistir ao Charla que celebraremos pasadomaña no Centro Social de Barrantes, as 20.30 Horas.

Alternativa Galega de Esquerda esixe a extinción do contrato de subministro eléctrico de Fenosa

O deputado Antón Sánchez propón un novo sistema de recollida do lixo que prime a redución, a reciclaxe e a reutilización e deixe de ser negocio para a compañía eléctrica privada  

Santiago de Compostela, 22 de novembro de 2013.- O deputado de Alternativa Galega de Esquerda (AGE) Antón Sánchez defenderá no pleno parlamentario da vindeira semana unha proposición non de lei (pnl, no documento anexo) para esixir da Xunta “a revisión ou extinción do contrato de subministro eléctrico de Sogama con Unión Fenosa, por ser claramente lesivo para o interese público”. Sánchez explicou, esta maña en rolda de prensa no Parlamento de Galicia, que o actual modelo de xestión de residuos ten como único obxectivo beneficiar a Gas Natural-Unión Fenosa. “Canto máis lixo se incinere, máis electricidade vende Fenosa, adxudicataria do contrato para o consumo propio de electricidade”, afirmou o deputado de AGE, “o sistema é ‘canto peor, mellor para Fenosa”. Nas actuais circunstancias, “Sogama é unha empresa pública ao servizo de Fenosa”.

O expediente de contratación de Fenosa foi autorizado en 2011 pola Xunta de Núñez Feijóo. “Ao comezo, a electricidade producida na planta era para autoconsumo da propia planta”, expuxo Sánchez, “mais por unha decisión política admitiuse a venda desa enerxía”. Esta autorización e a reforma enerxética de Mariano Rajoy foron as causantes da suba do canon do lixo.

Para Alternativa Galega de Esquerda, o problema de Sogama é de fondo. Alén de orientar a xestión de residuos ao negocio dunha empresa privada concreta –Gas Natural Unión Fenosa-, o problema é o modelo. “Un sistema que non prima nin a reutilización nin a reciclaxe nin a redución, senón a incineración, é aberrante, non existe en ningún lugar de Europa”, denunciou o parlamentario de AGE, antes de lle lembrar ao presidente de Sogama –Luis Lamas, do PP- que preside “unha empresa pública, de todas as galegas e galegos, así que non pode comportarse como un hooligan do Partido Popular”.

A xestión de Núñez Feijóo fai que Galiza perda autonomía financeira

O deputado de Alternativa Galega de Esquerda (AGE), Antón Sánchez, denunciou o espectacular incremento da débeda autonómica dende que Alberto Núñez Feijoo chegou á presidencia da Xunta de Galicia, que provocou o conseguinte incremento do custe anual do servizo da débeda aos galegos e galegas que ten consecuencias sobre a redución do gasto non financeiro e sobre a perda de autonomía financeira de Galiza, todo o contrario do que presume o Partido Popular.

No proxecto de Orzamentos da Xunta para o 2014, en trámite, o importe do total de operacións correntes (capítulos I ao V) : é de 7.213,8 millóns de euros e a suma de amortización capital e gastos financeiros da sección 22 (custo servizo débeda) é de 2.071,1 millóns de euros, polo cal a porcentaxe de custo da débeda sobre as operación correntes é de 28,71%, superior, por tanto, ao límite máximo do 25% que determina o art. 30.2 do DL 1/1999, Lei de réxime financeiro e orzamentario de Galicia (*)

O límite do 25% sobre os ingresos correntes sería de 1.803,5 millóns de euros, polo cal os Orzamentos excédense na sección 22 (custo do servizo da débeda) en 267,6 millóns de euros sobre o límite normativo que fixa a lexislación autonómica.

O incremento do custo do servizo da débeda (que case duplica ao do exercicio 2013) está causado tanto polo incremento dos gastos financeiros como, moi especialmente, polo incremento do endebedamento neto (que medra 115 millóns respecto do 2013, un 18% mais).

Consecuencia de dito incumprimento é que no 2014 todas as emisións de débeda da Xunta deben ser previamente autorizadas polo Estado (**).

Para Alternativa Galega de Esquerda resulta sorprendente ao respecto que nin na Memoria dos Orzamentos nin no Informe Económico-Financieiro se conteña a máis mínima referencia ao incumprimento do límite máximo do 25% que fixa a normativa autonómica de réxime económico-financieiro nin ao feito de como consecuencia de dito incumprimento as emisións de débeda da Xunta teñan que ser previamente autorizadas polo Estado.

“Pese a que o señor Nuñez Feijoo presume de non ter que recorrer ao Fondo de Liquidez Autonómico, por unha suposta solvencia da Xunta de Galicia, e que con iso nos financiamos máis barato, a realidade é ben distinta á que nos pinta un presidente demasiado acostumado a mentir” declarou o deputado Antón Sánchez.

O Consello de Ministros do pasado 31 de outubro acordou autorizar á Xunta a formalizar préstamos a longo prazo (podes comprobar no enlace) en moeda distinta do euro e emitir débeda pública por importe de 257.588.000 €. Ditas operación de endebedamento teñen por finalidade o financiamento do déficit orzamentario do exercicio 2013, acordado no Consello de Política Fiscal e Financeira do pasado 31 de xullo.

No DOG de hoxe publícase as condicións de dita emisión, a un tipo de interese do 2,75%(podes comprobar no enlace). Dito tipo de interese é superior ao tipo de interese da débeda equivalente do Estado (tiA xestión de Núñez Feijóo fai que Galiza perda autonomía financeira po de interese dos bonos do Estado a tres anos da última poxa : 2,064 %).

E non só iso senón tamén superior á emisión recente de débeda doutras comunidades autónomas, caso, por exemplo, da de Canarias, cun tipo de interese nominal fixo do 1,75%.(podes comprobar no enlace)

Por todo elo AGE, a través do seu deputado Antón Sánchez, rexistrou no Parlamento unha interpelación para que a Xunta de Galicia aclare a situación do financiamento da débeda e do seu custo. O goberno da Xunta debería explicar e xustificar como nunha situación de descenso dos tipos de interese do mercado da débeda pública nos Orzamentos do 2014 os gastos financeiros medran nun 18% respecto do 2013. “O interese do señor Feijoo de vender unha imaxe falsa da súa xestión económica pagámola todos e todas os galegos e galegas en forma de máis custo da débeda e menor gasto social” sinalou o deputado Antón Sánchez.

(*) O art. 30.2 do vixente Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, en relación coa débeda, dispón que “A contía das anualidades de amortización, incluído capital e xuros, non poderá exceder do 25% dos ingresos correntes previstos nos orzamentos xerais da Comunidade Autónoma en cada ano”.

(**) A Disposición Transitoria Terceira da LO 2/2012, de estabilidade orzamentaria habilita temporalmente (ata 2020) a non aplicación do límite do 25% fixado no art. 14.2 da LOFCA, pero requerindo para elo a concurrencia de circunstancias económicas extraordinarias e que o seu obxectivo sexa a cobertura dos servizos públicos fundamentais e precisando, ademáis, que nese suposto as operación de débeda deben ser previamente autorizadas polo Estado.

A PROMOTORA DA ÁREA COMERCIAL DE DEIRO ENTRA EN CONCURSO DE ACREDORES MENTRES O ACALDE SEGUE SEN DAR EXPLICACIÓNS

O Grupo local de ANOVA en Vilanova de Arousa critica a actitude do goberno local, que  oculta  información e é incapaz de dar a cara diante dos propietarios afectados e dos vecinos.

Xente entregando Curriculums no Concello de Vilanova
para o Centro Comercial meses antes das eleccións municipais.

O Grupo Local de ANOVA – Irmandade Nacionalista en Vilanova de Arousa quere informar os cidadáns de Vilanova, os membros da xunta de compensación da Área Comercial de Deiro e os propietarios de terreos que aínda non acabaron de cobrar a cesión dos mesmos, que a sociedade promotora da Área Comercial, DESARROLLOS VILANOVA, está en concurso de acredores e xa dende finais do mes de setembro con administración concursal designada e coas facultades de administración intervidas.

No pasado mes xuño, ANOVA xa advertiu que a mala situación financeira pola que pasaba a sociedade, o que unido á falta de perspectivas a curto prazo para acometer o desenvolvemento do proxecto, levouna a presentar pre-concurso. Informabamos de que a propia sociedade argumentaba como razóns para presentar o pre-concurso “que non fora capaz nestes anos de atopar socio investidor, promotor ou comprados dos terreos, a pesar de ser a súa principal prioridade” e de que propoñía aprazamentos dos pagos de ata 5-6 anos...

Xa daquela criticabamos a actitude do Concello por ocultar información sobre a situación real deste proxecto e enganar os cidadáns “vendendo fume”. Tamén lle pediamos explicacións dada a enorme implicación política do propio alcalde con este proxecto e tendo en conta ademais que o Concello forma parte da xunta de compensación creada para o desenvolvemento urbanístico da zona na que se tiña pensado facer a área comercial.  Lamentablemente coma sempre Gonzalo Durán perdeu a oportunidade de rectificar e pedir desculpas e o que fixo foi “botar balóns fóra" intentando desacreditar “o mensaxeiro”, acusándonos de mentir e cualificándonos “do peor”...

Pois ben, o tempo termina sacando á luz a verdade... Como demostra a documentación que adxuntamos no pasado mes de setembro, a sociedade DESARROLLOS VILANOVA presentaba solicitude de DECLARACIÓN DE CONCURSO DE ACREDORES, recoñecendo un pasivo de 2.190.646,55 €, procedentes na súa maior parte dun crédito hipotecario existente sobre os propios terreos. O Xulgado xa nomeou un administrador concursal (a empresa Forensic Solutions, SLP) que os administradores conservan as facultades de administración, pero sometidas a intervención dos administradores concursais, ou o que é o mesmo, non poderan tomar ninguna decisión transcendente para o desenrolo da actividade, sen o consentimento dos recentemente nomeados administradores concursais, para tentar chegar a un acordo cos acredores, ou se non é viable, proceder á liquidación da mesma con todos os seus activos, incluídos os dereitos sobre os terreos da área comercial de Deiro.

Esta actuación supón un novo atranco no desenvolvemento desa área comercial, cando menos a curto – medio prazo, todo co máis absoluto silencio por parte de quen foi o seu máximo impulsor e defensor, o alcalde de Vilanova, Gonzalo Durán.  Ao final terá que recoñecer que de “proxecto consolidado e firme” nada de nada; que o único que había era un intento de “pelotazo urbanístico” que se esfarelou como unha pedra de azucre pola crise do ladrillo.  

A entrada en concurso deixa na incertidume tanto os particulares donos de terreos que venderon e aínda non cobraron, como aqueles propietarios que quedaron incluídos na xunta de compensación. Os primeiros porque están a mercé do acordo de “quita e aprazamento de pagos”  ao que chegue a administración concursal cos acredores, pero tendo en conta que o principal acredor da sociedade e unha Entidade Financeira cos seus créditos privilexiados dos restantes, o ter unha garantía hipotecaria sobre os únicos activos da sociedade, que pode supor renunciar a parte da débeda e aprazar o cobro da mesma por varios anos; ou incluso no caso de non chegar a acordo e ter que liquidarse a sociedade perder parte ou toda a débeda xa que os terreos hipotecados terían que ir a subasta publica, na que faise moi difícil a adxudicación, por que solen quedar desertas.

E no caso dos propietarios que non venderon están en similar situación, xa que son membros dunha xunta de compensación duns terreos “indivisibles” que están afectados por unha hipoteca dunha empresa en concurso que pode chegar a liquidación, é dicir, ata que se resolva o concurso, non poden facer nada nos terreos e tampouco parece que se vaian desenvolver en varios anos.

Xente entregando Curriculums no Concello de Vilanova
para o Centro Comercial meses antes das eleccións municipais.

É por todo isto polo que dende ANOVA volvemos interpelar ao Goberno de Vilanova, e presentaremos un escrito no Concello nese sentido, para que dea explicacións públicas sobre a situación na que se atopa a Área Comercial; qué vai facer o Concello como membro da Xunta de Compensación para defender os seus dereitos, xa que tamén é propietario, e os dos demais propietarios veciños de Vilanova de Arousa e finalmente qué vai supor esta situación para a situación financeira do propio Concello.

Non hai que esquecer ao fío de todo isto que o Concello de Vilanova acaba de aprobar o seu segundo Plan de Axuste Financeiro que establece medidas e recortes para os próximos 10 anos e que tiña unha póliza de crédito solicitada para a compra do Pazo Vista Real vinculada aos ingresos que ía percibir pola venda do aproveitamento urbanístico que lle correspondía nesa Área Comercial, e que o propio Alcalde dixo que se podía transformar nun préstamo hipotecario, xa que estes ingresos parece que serán moi difícil de concretarse a medio prazo, pero que terá un alto custe financeiro para as xa maltrechas arcas municipais.

PARADE!!!

“Nenos, nenas…XOGADE!” Cantas veces temos escoitado esa frase, ou algo similar, na nosa infancia. O deporte é algo fundamental na nosa vida, nos acompaña dende cativos que é cando estamos máis activos e sempre vai ligado a nós como un método san e beneficioso pra a nosa saúde, autoestima, desenrolo social,… Na escola foméntano en forma de asinatura, Educación Física, no cal nos instrúen na práctica de diversas disciplinas (fútbol, baloncesto, vollei, bádminton,…).

Nestes tempos que nos toca vivir, todo semella que é ao contrario; unha nova medida tomada pola Xunta, gobernada por un PP tiránico e incompetente, obriga á paralización de toda actividade futbolística das categorías base (adestramentos e competicións dende cadetes ata prebenxamíns). A razón é a prórroga do seguro médico deportivo do PROGRAMA XOGADE (Xogos Galegos Deportivos en Idade Escolar), impedindo a práctica do fútbol ao arriscar aos clubs a correr eles cos altos gastos médicos dos seus xogadores no caso de se mancar. O devandito programa naceu pra apoiar aos equipos en categorías base de distintas modalidades deportivas pra cubrir o pago da mutualidade, o que supón un alivio pra a economía de moitos clubs; sempre houbo a ameaza durante varias tempadas de que esta axuda desaparecería, e semella que desta vez cumpriuse. Analizando a situación, as consecuencias directas, serían as seguintes: os xogadores con ficha en vigor do ano anterior teñen a asistencia médica cuberta ata decembro, ao estar contratado un ano natural grazas á tempada pasada, o problema radica nos novos xogadores, eles son quenes non terían ningún dereito ao retirárselle automáticamente o seguro.

Esta decisión afectará a milleiros e milleiros de menores galegos que comezaban con toda a ilusión do mundo esta tempada, e que de noite pra mañá poderían verse sen equipo, e o máis preocupante, os gastos dos pais e nais e principalmente dos equipos que xa están realizados.

A Xunta de Galicia a través da Secretaría Xeral para o Deporte, sendo cómplice das prácticas recortantes provintes de Madrid, non está apoiando á realización do deporte en xeral a todos os niveis, menosprezando disciplinas frente a outras, favorecendo uns equipos frente a outros, mantendo cargos, exercendo o enchufismo “por doquier”, as taxas abusivas das federacións, os prezos das entradas aos ximnasios,… Acaso alguén pensa que é unha boa xestión do deporte? Isto traerá consecuencias nas persoas de non favorecer á súa práctica: fomento do sedentarismo, enfermidades cardiovasculares, baixa autoestima, depresión, problemas para durmir, sensación de cansancio, problemas de relacións sociais, obesidade,…

A práctica do deporte non pode faltar nas nosas vidas e dende cativos haina que fomentar. É un deber da sociedade pra ter un futuro san.